លោកឡោ សុខា ស្នងការនគរបាលខេត្តមណ្ឌលគិរីមើលល្បែងស៊ីសងច្រើនប្រភេទនៅក្រោមភ្នែកលោកផ្លុង ជំនិត អធិការនគរបាលស្រុកពេជ្រាដាផង

ខេត្តមណ្ឌលគីរី÷ ល្បែងជល់មាន់នៅតែបន្តដំណើរការជាធម្មតា តាមចំការ កៅស៊ូ,ចំការម្រេច,ចំការស្វាយចន្ទី...របស់ប្រជាពលរដ្ឋនៅឃុំប៊ូស្រា ស្រុកពេជ្រាដា ខេត្តមណ្ឌលគិរី ដែលប្រការនេះទាមទារឲ្យលោកឡោ សុខា ស្នងការនគរបាលខេត្ត មណ្ឌលគិរី មើលការដឹកនាំរបស់លោកផ្លុង ជំនិតអធិការនគរបាលស្រុកពេជ្រាដានោះផង។ អ្នកភូមិបានឱ្យដឹងថា ក្រៅពីប្រជាពលរដ្ឋធម្មតា ក៏មានថ្នាក់ដឹកនាំស្រុកជាអ្នកចូលចិត្តលេងល្បែងស៊ីសងជល់មាន់នេះដែរ។

ប្រជាពលរដ្ឋខ្សិបថា សង្វៀនជល់ចល័តចុះឡើងកំពុងញាំញីអង្រួនជីវភាព រស់នៅប្រជាពលរដ្ឋនៅទីប្រជុំជនប៊ូស្រា ឃុំប៊ូស្រា ស្រុកពេជ្រាដា ខេត្តមណ្ឌលគិរី។ អ្នក ភូមិថា ល្បែងជល់មាន់នៅក្នុងស្រុកពេជ្រាដា ជាពិសេសនៅទីប្រជុំជនប៊ូស្រា ហាក់ដូចជាគ្មានខ្លាចច្បាប់ទម្លាប់របស់ប្រទេសនោះឡើយ។ មិនតែប៉ុណ្ណោះ អាជ្ញាធរថ្នាក់ស្រុក ត្រូវប្រជាពលរដ្ឋមើលឃើញថា ជាអ្នកដើមភ្លើងឲ្យមានវង់ល្បែងស៊ីសងនោះទៅវិញ។ លោកអភិបាលស្រុក ក៏ដូចជា អធិការស្រុក..ជិះរថយន្តចុះឡើងនៅទីប្រជុំជនប៊ូស្រា គឺដើម្បីហៅគ្នីគ្នាទៅជល់មាន់ មិនមែនមើលបញ្ហាសន្តិសុខសុវត្ថិភាព ជូនប្រជាពលរដ្ឋនោះទេ ។ លោកអធិការផ្លុង ជំនិត ជិះរថយន្តហ្វតពណ៌សដើម្បីហៅគ្នីគ្នាទៅលេងមាន់តែប៉ុណ្ណោះ។ ទាំងចៅហ្វាយស្រុក វណ្ណា ម៉ាប់និងអធិការស្រុក ផ្លុង ជំនិត ..បានប្រយោជន៍ច្រើនពីសង្វៀនជល់មាន់គឺបានលេងខ្លួនឯងផងនិងបានលុយពីម្ចាស់សង្វៀនផង។

ប្រភពខ្សឹបខ្សៀវពីប្រជាពលរដ្ឋក្នុងមូលដ្ឋានបានឲ្យដឹងថា លោកវណ្ណា ម៉ាប់ អភិបាលស្រុកពេជ្រាដា ក៏ជាអ្នក មាននិស្ស័យលើវិស័យបក្សីកីឡានេះដែរ។ ថ្មីៗនេះលោកអភិបាលស្រុកត្រូវគេខ្សឹបតៗគ្នាថា ឈ្នះប្រាក់ពីសង្វៀនជល់មាន់ ប្រមាណ៣លានរៀល គ្រាន់បានផឹកស្រាមួយល្ងាចដែរ។ ដោយសារតែលោកអភិបាលស្រុក ចូលចិត្តយ៉ាងនេះហើយ ទើបបានជាមន្ត្រីផ្សេងទៀតរួម លោកផ្លុង ជំនិតអធិការស្រុកនិងលោកមេប៉ុស្តិ៍នាំគ្នាដង្ហែរ តាម លោកចៅហ្វាយស្រុក។ បើគ្មានការបើកភ្លើងខៀវគប់គិតពីអាជ្ញាធរមានសមត្ថកិច្ច ពោលគឺមន្ត្រីនគរបាលទេនោះ ពួកគេមិនអាចបើកសង្វៀនជល់មាន់និងលេង ល្បែងស៊ី សងគ្រប់ប្រភេទបានតាមអំពើចិត្តដូចសព្វថ្ងៃនេះទេ។ នៅព្រឹកថ្ងៃទី២៦ ខែមីនា គេរាយការណ៍ថា សង្វៀនជល់ មាន់បានចាប់ផ្ដើមនៅម៉ោង៨ ក្នុងចម្ការម្រេច១កន្លែង។

ប្រភពប្រាប់ថា ដើម្បីសុវត្ថិភាពជៀសវាងការបែកធ្លាយរូបភាពផ្សេងៗចេញពីសង្វៀនជល់មាន់ សមត្ថកិច្ចបានស្នើសុំ មិនអនុញ្ញាតឲ្យអ្នកចូល ក្នុងសង្វៀនជល់មាន់យកទូរសព្ទដៃដើម្បីថតរូបភាពទៅជាមួយនោះឡើយ។ គេនិយាយថា គឺដើម្បីសុវត្ថិភាពទាំងអស់គ្នា។ ដូច្នេះមិនអាចមាននរណា ថតរូបភាពលេងជល់មាន់ឬទីតាំងជល់ មាន់នោះបានទេ។ យ៉ាងណាក៏ដោយគេបង្ហើបថា យ៉ាង ហោចណាស់ទីតាំងសម្រាប់ជល់មាន់មាន៣ កន្លែងគឺនៅតាមចំការកៅស៊ូ,ចំការស្វាយចន្ទីនិងចម្ការម្រេច។

មន្ត្រីមានសមត្ថកិច្ច នៅសាលាស្រុកពេជ្រជ្រាដាមួយរូបនិយាយថា បញ្ហាសង្វៀនមាន់ក៏ដូចជាល្បែងស៊ីសងនៅតាមផ្ទះរបស់អ្នកភូមិក្នុងតំបន់ប៊ូស្រា គេទទួលស្គាល់ថាមានការកើនឡើងគួរឲ្យកត់សម្គាល់ មួយរយៈចុងក្រោយ នេះ។ ប្រសិនបើគ្មានការត្រូវរ៉ូវពីអាជ្ញាធរមានសមត្ថកិច្ច ទីនោះទេ ពួកអ្នកលេងល្បែងទាំងនោះ ពិតជាមិនអាចដំណើរការបានដោយងាយស្រួលនិងជាចំហដូចសព្វថ្ងៃនេះឡើយ។ ដូច្នេះប្រជាពលរដ្ឋស្នើសុំ លោកឡោ សុខាស្នងការនគរបាលខេត្តមណ្ឌលគីរីពិនិត្យមើលរបៀបរបបការងារលោកផ្លុង ជំនិត អធិការស្រុកពេជ្រាដាដែលទើបឡើងកាន់តំណែងថ្មីនេះផង។

ទំនាក់ទំនងព័ត៌មាន 095441817