មន្ទីរកសិកម្មខេត្តស្ទឹងត្រែង ជំរុញឱ្យកសិករបង្កើនការដាំបន្លែសរីរាង្គ ដោយអនុវត្តតាមគម្រោងសាកវប្បកម្មកម្ពុជា
ស្ទឹងត្រែង - មន្ទីរកសិកម្ម រុក្ខាប្រមាញ់ និង នេសាទ ខេត្តស្ទឹងត្រែង សហការជាមួយគម្រោងសាកវប្បកម្មកម្ពុជា ជំរុញឱ្យកសិករបង្កើនការដាំបន្លែសរីរាង្គ គ្មានកាកសំណល់កសិកម្ម ព្រោះវាជាតម្រូវការទីផ្សារ ហើយបានជួយកសិករឱ្យរក ចំណូលបានច្រើន ព្រោះអតិថិជននិយមបរិភោគ។
ក្នុងឱកាសចុះពិនិត្យសួនបន្លែដែលបានបង្កើតឡើងដោយមានការគាំទ្រពីគម្រោងសាកវប្បកម្មកម្ពុជានៅខេត្តស្ទឹងត្រែង លោក ទុំនីរ៉ូ ប្រធានមន្ទីរកសិកម្ម រុក្ខាប្រមាញ់ និង នេសាទខេត្ត បានបញ្ជាក់ថា៖ គម្រោងនេះទទួលបានជោគជ័យ ព្រោះបច្ចុប្បន្នមាន កសិករចូលរួមអនុវត្តបានច្រើនគ្នា និងកំពុងដាំដុះបន្លែបានច្រើនប្រភេទ សម្រាប់នាំចេញទៅលក់នៅទីផ្សារ ហើយបានទប់ស្កាត់ ការនាំចូលបន្លែពីប្រទេសជិតខាងផង។
លោកសំណូមពរឱ្យកសិករផ្សេងៗទៀតដែលកំពុងដាំបន្លែជាលក្ខណៈគ្រួសារ ត្រូវមកសិក្សាពីការដាំដុះបន្លែ ដើម្បីធ្វើការ ផ្លាស់ប្ដូរទម្លាប់នៃការដាំដុះ មកដាំតាមបច្ចេកទេសវិញ និងបានធ្វើអាជីវកម្មលក់ដូរផង ដូច្នេះចូរបងប្អូនកសិករយើង ប្រឹងប្រែង ហាត់រៀនពីគ្នាទៅវិញទៅមក ដើម្បីធ្វើការដាំដុះបានទិន្នផលខ្ពស់។
សំឡេង៖ "វិស័យកសិកម្មនៅខេត្តស្ទឹងត្រែងប៉ុន្មានឆ្នាំថ្មីៗនេះយើងបានរុញឱ្យពួកគាត់ បានខ្ពស់នូវទិន្នផលទាំងការផលិតរបស់គាត់ ទាំងពូជអីផ្សេងៗដើម្បីជាមូលដ្ឋានមន្ទីរកសិកម្មយើងនេះ យើងខិតខំស្វែងរកនូវបច្ចេកទេសថ្មីៗ ដើម្បីយកមកផ្សព្វផ្សាយ និងណែនាំជូនទៅដល់បងប្អូន ដើម្បីធ្វើការដាំដុះដើម្បីទទួលបានគុណភាពនិងទិន្នផលខ្ពស់ "។
លោក ហយ ចន្ត្រា កសិករគំរូដាំដំណាំបន្លែនៅភូមិហាងសាវ៉ាត ឃុំសាឃួយបានអះអាងថា៖លោកអាចចែករំលែកបទពិសោធន៍ នៃការដាំដុះបន្លែទៅបងប្អូនកសិករផ្សេងៗទៀតបាននូវអ្វីដែលធ្វើកើត និងទទួលបានលទ្ធផលល្អប្រកបដោយជោគជ័យនេះ។
លោកបន្តថា៖បច្ចុប្បន្នសង្កេតឃើញកសិករភាគច្រើនបានផ្លាស់ប្ដូរទម្លាប់នៃការដាំដុះហើយ គ្រាន់តែកសិករយើងមួយចំនួន ពួកគាត់នៅមិនទាន់អនុវត្តបច្ចេកទេសដាំដុះបានត្រឹមត្រូវនៅឡើយនោះទេ ហើយកសិករខ្លះទៀតពុំទាន់មានលទ្ធភាពគ្រប់គ្រាន់ ក្នុងការរៀបចំសួនបន្លែ ទៅតាមបច្ចេកទេសថ្មីនៅឡើយដែរ។
លោកស្រី ខាវ ខាំអ៊ន មេឃុំសាមឃួយ បានបញ្ជាក់ថា៖ ភាពខ្វះខាតនេះ សូមឱ្យគម្រោងសាកវប្បកម្មកម្ពុជានិងអង្គការដៃគូ ជួយកសិករយើងបន្ថែមទៀត ដើម្បីឱ្យការដាំបន្លែមានសកម្មភាពកើនឡើងនៅតាមមូលដ្ឋាននីមួយៗ និងបាននាំបន្លែចេញ ទៅលក់នៅទីផ្សារជំនួសការទិញមកបរិភោគ។
លោកស្រី បន្ថែមថា៖នេះជាកត្តាចម្បងក្នុងការដោះស្រាយជីវភាពរស់នៅផងនិងបានរួមគ្នា កាត់បន្ថយការពឹងផ្អែក ក្នុងការ ដើរស៊ីឈ្នួល លក់កម្លាំងពលកម្ម ឬពឹងផ្អែកលើផលអនុផលព្រៃឈើ និងការចុះទូកទៅធ្វើនេសាទដែលនាំឱ្យ ជួបហានិភ័យផ្សេងៗ នៅក្នុងរដូវបិទនេសាទនេះ។
សូមបញ្ជាក់ថា៖នៅខេត្តស្ទឹងត្រែងមានកសិករ៤៦ក្រុម កំពុងនាំគ្នាផលិតបន្លែសរីរាង្គនេះ មានដូចជា ម្រះ-សណ្តែកួរ ននោង-ពោត-ល្ហុង-ត្រឡាច-ត្រប់-ត្រសក់ ប៉េងប៉ោះ ម្ទេសប្លោក ស្ពៃគ្រប់មុខ សាលាដ ខាត់ណា ត្រកួន-ស្ពៃក្តោបជាដើម៕
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMHlSQXc9PSIsImV4cCI6bnVsbCwicHVyIjoiYmxvYl9pZCJ9fQ==--ecb79a1deab598fa18baacdb537cf3c67a16b658/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/9C6D60F9-3F7A-484B-973E-6B3DEF6.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMDJSQXc9PSIsImV4cCI6bnVsbCwicHVyIjoiYmxvYl9pZCJ9fQ==--0fee652f4b6de24c4bf08cd627c658b46315e9cb/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/57F4B378-5D0D-47B2-8DAF-BCC520A.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMHVSQXc9PSIsImV4cCI6bnVsbCwicHVyIjoiYmxvYl9pZCJ9fQ==--be5b3a0c5a9c6f96e08c0fa2fde42295c95fdfc3/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/41FA599A-600E-4669-A210-72A1533.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMG1SQXc9PSIsImV4cCI6bnVsbCwicHVyIjoiYmxvYl9pZCJ9fQ==--0b7068883094d1ed8c59f8391f91d14d3f2661dd/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/4025721E-E440-4A44-A0AC-BF37843.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMGFSQXc9PSIsImV4cCI6bnVsbCwicHVyIjoiYmxvYl9pZCJ9fQ==--e24a9722224585ae143823fb5f13ec0f4f749fbc/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/1236F472-DD57-4D18-982D-295CB35.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMGVSQXc9PSIsImV4cCI6bnVsbCwicHVyIjoiYmxvYl9pZCJ9fQ==--142d2e6f82f89d3e41db5da562478e3a7bb888c4/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/88F7F615-9AD8-49F9-BC25-A0B0D9F.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMGlSQXc9PSIsImV4cCI6bnVsbCwicHVyIjoiYmxvYl9pZCJ9fQ==--bb43fd44a9e71d6abee23a33b0372b31c122b729/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/491F0DE0-254E-40FE-9AE3-E2D543A.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMHFSQXc9PSIsImV4cCI6bnVsbCwicHVyIjoiYmxvYl9pZCJ9fQ==--a695d37377f13deb4d4682166219c0647f6e0dcd/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/3372E845-1000-44E6-B45C-D8897FA.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMDZSQXc9PSIsImV4cCI6bnVsbCwicHVyIjoiYmxvYl9pZCJ9fQ==--bd054cd28bff4fdb52d998cdb760099f4f2a4f10/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/5CB62BD8-5A49-43B9-AA10-AA85196.jpeg)
No comments