ប្រជាពលរដ្ឋ​ចោទប្រកាន់ក្រុមហ៊ុន​ កូ ណៃ យកដុំថ្មធំៗ​ បិទផ្លូវ និងរាយលួសបន្លាព័ទ្ធយកដីភ្នំរដ្ឋនិងដីប្រជាពលរដ្ឋ

ភ្នំពេញៈ​ ប្រជាពលរដ្ឋបានធ្វេីការចោទប្រកាន់ថា ក្រុមហ៊ុន​ កូ ណៃ ឃុបឃិតជាមួយមន្ត្រីមួយចំនួនបិទផ្លូវដោយដាក់ដុំថ្ម ដាំបង្គោល និងរាយបន្លាព័ទ្ធយកដីភ្នំកងវ៉ារបស់រដ្ឋ​ និងដីប្រជាពលរដ្ឋ ដែលមានទីតាំងស្ថិតនៅចំណុចជួរភ្នំកងវ៉ា ក្នុងភូមិកងវ៉ាសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។

ប្រជាពលរដ្ឋរស់នៅភូមិកងវ៉ា​ និងភូមិពង្រ​ សង្កាត់កំពង់ស្វាយ​បានឲ្យដឹងថា​ មន្ត្រីមួយចំនួន​ត្រូវរ៉ូវគ្នាជាមួយថៅកែក្រុមហ៊ុន​ កូ ណៃ បានបិទផ្លូវសហគមន៍ទៅចម្ការ​ និងស្រែមួយកន្លែង ដោយបានយកដុំថ្មធំៗ​ បិទផ្លូវ្រជាពលរដ្ឋធ្វើដំណើរដឹកកសិផល និងដីអាស្រ័យផល ចិញ្ចឹមសត្វ។

ប្រភពដដែលបានបញ្ជាក់​ ក្រុមហ៊ុន​ កូ​ ណៃ​ បានធ្វើរបងដាក់បន្លាលួស និងយកដុំថ្មធំៗ​ មកបិទផ្លូវនិងព័ទ្ធភ្នំកងវ៉ារបស់រដ្ឋ​ យកដីភ្នំរដ្ឋដែលក្រុមហ៊ុនហ៊ុនបានសុំអាជ្ញាប័ណ្ណកាយដីយករួចហើយ មិនព្រមប្រគល់ជូនរដ្ឋ តែបែរជាព័ទ្ធធ្វើកម្មសិទ្ធិផ្ទាល់ខ្លួនទៅវិញ។

បេីតាមប្រធានមន្ទីររ៉ែ​ និងថាមពលខេត្តបន្ទាយមានជ័យ លោក សុត វឌ្ឍនា បានបញ្ជាក់ថា ក្រោយកាយអាចម៍ដី ថ្មពីភ្នំឬដីរដ្ឋចេញរួចក្រុមហ៊ុនត្រូវប្រគល់ថ្នាលដីអោយរដ្ឋវិញ។​ ករណីដែលថា ក្រមហ៊ុន​ កូ​ ណៃ​ យកថ្មធំ ដាំបង្កោលនិងរាយលួសបន្លាព័ទ្ធបិទផ្លូវគឺវាជាសមត្ថកិច្ចដោះស្រាយរបស់អាជ្ញាធរភូមិ សង្កាត់ ក្រុង ខេត្ត។
ហេីយលោកនឹងចាត់មន្ត្រីអោយចុះទៅពិនិត្យ វាយតម្លៃនិងរាយការណ៍នៅចំណុចទីតាំងដីភ្នំដែលថា មានការហ៊ុំព័ទ្ធយក ហើយបិទផ្លូវរបស់ប្រជាពលរដ្ឋ។

ចំណែកលោកអ៊ុំ​ រាត្រី​ អភិបាលខេត្តបន្ទាយមានជ័យ​ បានអោយដឹងថា​ អភិបាលក្រុងសិរីសោភ័ណ្ឌ​ កំពុងតែធ្វេីការងារនេះហេីយ​ លោកតែងតែផ្តល់សិទ្ធិអំណាចទៅអោយមូលដ្ឋានធ្វេីការ៕